dil mein ik lahar si uthii hai abhi
koi taazaa havaa chalii hai abhi
shor barpaa hai Khaanaa-e-dil mein
koi diivaar sii girii hai abhi
kuchh to naazuk mizaaj hai.n ham bhii
aur ye choT bhii nai hai abhi
bharii duniyaa mein ji nahii.n lagataa
jaane kis chiiz ki kamii hai abhi
tuu shariik-e-suKhan nahii.n hai to kyaa
ham-suKhan terii Khaamoshii hai abhi
yaad ke be-nishaaN jaziiron se
terii aavaaz aa rahii hai abhi
shahar ke be-charaaG galiyon mein
zindagii tujh ko DhuuNDhatii hai abhi
so gaye log us havelii ke
ek khiDkii magar khulii hai abhi
tum to yaaro abhi se uTh baiThe
shahar mein raat jaagatii hai abhi
vaqt achchhaa bhii aayegaa ‘Nasir’
Gam na kar zindagii padii hai abhi
No comments:
Post a Comment